وسدے علاقے دے نواب کدی ملو ہا
ڈاڈھے پئے ہائیں اودرے جناب کدی مِلو ہا
سنگیّاں دے نال ایڈے جڑدے اناد نئیں
اللہ دی سونہہ تیرے بِناں جِینڑ دا سواد نئیں
کھاندائے وِچھوڑے دا عذاب کدی مِلو ہا
ڈاڈھے پئے ہائیں اودرے جناب کدی مِلو ہا
یاداں سرکار دیاں مَن توں نئیں لاہندیاں
سوچاں اِچ پوہ دیاں راتاں لنگھ جاندیاں
ہوندی پئی اے زندگی خراب کدی ملو ہا
ڈاڈھے پئے ہائیں اودرے جناب کدی ملو ہا
کداں تک راہنڑیاں نیں ساڈیاں بےوسیاں
تھل وانگوں اکھیاں نمانڑیاں نیں تسّیاں
اکھاں وچوں پینڑی اے شراب کدی ملو ہا
ڈاڈھے پئے ہائیں اودرے جناب کدی ملو ہا
اتنڑائیں ہاڑا دکھی دل پکار دا
کیویں ہے گزارا تیرے دردبیمار دا
پڑھو ہا دکھ دی کتاب کدی ملو ہا
ڈاڈھے پئے ہائیں اودرے جناب کدی ملو ہا
No comments:
Post a Comment