قاصدا احسان کر آخری بیمار تے
چھیتی چھیتی اپڑے خط دلدار تے
اودھی تے دوریاں عذاب سٹ چھوڑیا اے
جیویں کسے اگ تے کباب سٹ چھوڑیا اے
ایڈےوڈے گھر وچ کلا کلا ہوندا ہاں
ویکھ تصویر اودھی ہر ویلے روندا ہاں
ٹر گیا ہجر دے تیر مینوں مار کے
قاصدا احسان کر۔۔۔۔۔۔۔۔۔
توئیں اجے تئیں میرا یار نئیں ویکھیا
جتھے پیا وسدا اے شہر نئیں ویکھیا
تینوں میں دساں سارا پتا اودھے گھر دا
متاں کھڑکاویں اتھے کنڈا بوہے ہر دا
ہوسیں پریشان گلاں میریاں وسار کے
قاصدا احسان کر۔۔۔۔۔۔۔۔۔۔
شہر جدوں آوے لیہہ پہلے چوک پاونڑا ایں
جیہڑا لکھ دیتا اے اوہ محلہ پچھ لاونڑا اے
تھوڑا جیا ٹر کے سکول اگو آونڑا ایں
سکولے کولوں لاہندے آ لے پاسے تو بھاونڑا ایں
اگےرکھ ٹالیاں دے ہوسنیں قطار تے
قاصدا احسان کر۔۔۔۔۔۔۔۔۔۔۔
ٹالیاں اگو پدھ تھوڑا جیا کرنا
چٹا اوہ مسیت دا مینار نہ وسرنا
مینار کولوں پہلی پہلی گلی مڑ جاونڑا
ساوا دروازہ ہولےہولے کھڑکاونڑا
پھلاں آلی بوٹی ہوسی گھر دی دیوار تے
قاصدا احسان کر۔۔۔۔۔۔۔
دساں تینوں ماہی دیاں پکیاں نشانڑیاں
متاں بھل جاویں اودھی اکھیاں نیمانڑیاں
لمے لمے وال نالے گورا چٹا رنگ اے
اکھیاں نشیلیاں تے پتلا پتنگ اے
کالا جیا تل ہوسی کھبےرخسار تے
قاصدا احسان کر۔۔۔۔
پہلے کھن اندرو اوہ تیرے نال بول سے
ناں تیرا پچھ کے تے پچھےکنڈا کھول سی
اونہوں آکھیں خط ہائ نجمی غریب دا
اکھیں اتے ہتھ ہیسو ملنڑ نصیب دا
ساہ پیا لیندا اے بس تیرے انتظار تے
قاصدا احسان کر آخری بیمار تے