جھنگ پئی وینی آں اے سی ٹائم تے بہہ گئی ہاں ,,
سکھاں کانڑ لائیاں اُلٹا دکھاں وچ پئے گئی ہاں ,,
بازار وِکاندی ٹافی , ہو گئی غلطی دے چا معافی ,
جھنگ پئی وینی آں راہ تے اڈا 84 آ ,
ماہی ہمتال آ کداں ساتھوں کاوڑ لاہسی آ ,
بازار وِکاندیاں کھَٹیاں , ساری عمر مصیباں کَٹیاں ,
جھنگ پئی وینی آں 92 موڑ کراس ہویا ,
مُونہہ تے لگیاں تاں سانوں آنڑ احساس ہویا ,
بازار اچ وِکن سموسے , راٹھ سمجھ کے لَڑ لگیوسے ,
جھنگ پئی وینی آں چاوے آلی لتھی سواری آ ,
سَٹیں نئیں ڈھولا تیری ساڈی توڑ دی یاری آ ,
بازار وِکاندا میوا , شالا کر لئے ڈھول منیوا ,
جھنگ پئی وینی آں اگوں پٹھانڑ کوٹ آونڑاں ایں ,
رُٹھا ہویا ڈھولا اساں ہتھ جوڑ مناونڑاں ایں ,
بازار وِکاندا تِلہ , جی آیائیں سَت بسم اللہ ,
جھنگ پئی وینی آں تاں ساہیوال سٹاپ آیا ,
وَنڈاں میں شرینڑیاں ماھی ساڈے ویہڑے آپ آیا ,
بازار وِکاندے پاوے , شالا ڈھولا نت پیا آوے ,
جھنگ پئی وینی آں اگوں سیال شریف آسی ,
سیج وِچھیساں جداں ڈھولا لئے تشریف آسی ,
بازار وِکاندی کھَاری , تیتھوں کائی نئیں چیز پیاری ,
جھنگ پئی وینی آں راہ تے اڈا نہنگ ماہیا ,
نانہہ نئیں کرنی بھاویں ساتھوں جان وی منگ ماہیا ,,
بازار وِکاندے سرئیے , بخت پرایا مانڑ نہ کرئیے ,
جھنگ پئی وینی آں لگھی جہانیے شاہ کولوں ,
فخر نہ کرئیے ڈرئیے بےپرواہ کولوں ,
بازار وِکاندے جوڑے , پیش نہ پوون ڈھول وچھوڑے ,
جھنگ پئی وینی آں اَکڑے آلے بریک ہوسی ,
پُچھسی ڈھولا شالا ساڈی قسمت نیک ہوسی ,
بازار وِکاندے چھولے , شالا سجنڑ نہ ہوون اوہلے ,
جھنگ پئی وینی آں جھامرے گڈی کھلو گئی اے ,
مِل گیا ڈھولا حج ساڈی اکھیں دی ھو گئی اے ,
بازار وِکاندا بکرا , ساڈا سانگا ملکھ توں وَکھرا ,
جھنگ پئی وینی آں راہ تے چُنڈ بھَروانڑاں ایں ,
سَڑے پئی دُنیا اساں دوہاں کَٹھیاں راہنڑاں ایں ,
بازار وِکاندا ڈُوہنڑاں , میرا ڈھولا ملکھ توں سوہنڑاں ,
جھنگ پئی وینی آں اگوں دریا دا پُل ماہیا ,
توہاں میری زندگی توہاں کائنات دا مُل ماہیا ,
بازار وِکاندے کیک اے , ہوندی بہوں سجنڑاں دی ٹیک اے ,
جھنگ پئی وینی آں لاری اڈے تے لہہ پوساں ,
اکھیں پئیاں ٹَھرسن ”درؔد“ دی نوکر رِہ پوساں ,