پوہ اچ بارش وسن لگ پئی کہیں توں خوشیاں کھسن لگ پئ
کچے کوٹھے چوون لگ پئے بال غریب دے روون لگ پئے
کئی معصوم ہن وانگ فقیراں کہیں دے گل اچ پاٹیاں لیراں
ٹھڈ توں تھر تھر کمبنڑ لگ سر تے کورے جمن لگ پئے
ماں ہک کھنج توں لکڑیں چا کے ادھ اچ بہہ گئی اگ مچا کے
رو رو بالاں حال ونجائے چا ہن تاں اللہ کرم کمائے چا
ٹھڈ توں اماں بھوک لگ پئی ہے سن کے بیوہ مردی گئی ہے
بھوک دا بدل پاٹا کوئی ناں گھر دے وچ ہائی آٹا کوئی ناں
بخت دے مندریاں چھلے نئیں سی پیسہ ٹکا پلے نئیں سی
بالاں بھوک توں شور مچایا کہیں ناں آ کے حال ونڈایا
زردار گواہڈی ہلیہ کوئی ناں اللہ وی مینہ ٹھلیہ کوئی ناں
غربت دے رسے وڈھ ناں سگی بال وی کلہے چھڈ ناں سگی
بکل دے وچ لائے کہ بیٹھی سبھے صدمے سہہ کے بیٹھی
جھڑی جمعے دی رکی کوئی ناں ہنج لاچار دی سکی کوئی ناں
بھج کے ہو گئے کپڑے بھتے ڈگی پئی سی بالاں اتے
ابھڑ بھاندے بھائیں کے ڈھٹس وت حسن ناں سائیں کے ڈٹھس
دل اچ وسن دی سک ناں رہ گئ جھگی جاہی جو ہک ناں رہ گئی
گل اچ پائے گیوس ہور ہک پھاہنا مر گیوس بال ہک بھوکا بھانڑاں
کدھاں نپ کے ڈگدی ڈھاندی ڈیرے آ گئی اٹھدی باہندی
ہوٹاں دے وچ چتھ کے چنی ڈیرے دار نوں ویکھ کے رنی
غم دے زور توں چپ جو ترٹی آکھن لگی وت مکھتی
مینوں اج خیرات تاں دے چا کفن دے کانڑ زکوٰۃ تاں دے چا
دولت مند اگوں ہس کے ڈٹھا تیر نگاہیں دے کس کے ڈٹھا
رو نئیں اڑیئ اندر آ جا آنڑ کے باہواں وچ سما جا
تھگڑی جوتی دا لارا لائس نالے سو دا نوٹ وکھائس
اج تاں سیج سجاون دے چا دل دی پیاس بجھاون دے چا
نیت وکھائی چا جدنڑ وڈیرے انج پئے چلدن اج کل ڈیرے
عزت بچا کے نس کے آ گئی نالے ایہ گل دس کے آ گئی
رعیت دیاں کتھے لجاں گیاں تیریاں کتھے حجاں گیاں
قرض حیا دا بھریا کوئی نہوں نالے رب توں ڈریا کوئی نہو
اتنی کر تے پچھاں بھنی گل سردار دی لہہ گئی سنھی
پتر دی لاش تے آ کے ڈگی نالے ہو گئی آپ وی ڈھگی
حسن رنڈیپا کٹ کے مر گئی صابر چپاں وٹ کے مر گئی
کیویں آکھاں ہس تے مر گئی لوکاں نوں ایہ دس کے مر گئی
سر اچ شالہ خاک ناں دیوئے غربت اللہ پاک ناں دیوے
No comments:
Post a Comment