bey wafai dey parwurda mahole which peyar da hath wadhawun barra jurm aey

بے وفائی دے پروردہ ماحول دے وچ پیار دا ہتھ ودھانڑ بڑا جرم ہے

جیندیاں جی جہنم توں ودھ اے سزا کسے نوں لگدا بناونڑ بڑا جرم ہے

میں نبھائے کلہیٹے دے ایام وی وت تعلق دے رنگپور دے رنگ ویکھیم

ماپیاں دا میں رج تخت ہزارا ڈیٹھہ دوستاں دے ویراگاں دا جھنگ ویکھیم

اپنے وطناں دا حاتم وی بنڑیاں ریہم بوہے بوہے دے ٹکڑے وی منگ ویکھیم

اپنے ویہڑے نوں ہسدا تے وسدا ڈیٹھم وت اسے گھر دے جندرے تے زنگ ویکھیم 

مختصر زندگی وچ سبق مل گیائے راز کہیں نوں دساونڑ بڑا جرم ہے

بند(2) لا کے ہوٹھاں نوں میں جندرا احساس دا بے وپاری دی چکی اچ پسدا ریہم

چا کے سر تے حبیباں دی بےرحمیاں سِنے ایرے دے وانگوں میں ہسدا ریہم

اندرے اندرے توڑے آپ گلدا ریہم مہرباناں نوں خوش باش دسدا ریہم

خلق دی آڑ اچ او لٹیندے رہے میں لٹیی کے وی اوناں تے وسدا ریہم

لکھ خدا دی قسم دورِ حاضر دے وچ راٹھ مخلص سداونڑ بڑا جرم ہے

ہر دعا بدلے جھولی پئیم بددعا میکوں تعریف بدلے بکھیڑے ملے

نیندراں بدلے راتاں دا جاگنڑ ڈھہا میکوں آرام بدلے تھکیڑے ملے

ہاسیاں بدلےعمراں دا رونڑ ڈھہیا بدلے رانجھنڑ دے نااہل کھیڑے ملے

میری غربت دی رت نال ناندے راہے میکوں اج توڑی ہمراز جہیڑے ملے

ٹھوکراں کھا کے احساس ہویائے اج وقتی جی توں وکاونڑ بڑا جرم ہے

کہیں دی پکھیاں نوں شاہی محل سمجھیم اپنا شاہانہ آباد گھر چھوڑیا

کر کے قربان خوشیاں حیاتی دیاں اپنا دامن دکھاں نال بھر چھوڑیا

کہیں دی عظمت دوبالا کرن واسطے آپ نوں ککھاں توں ہولا میں کر چھوڑیا

کوئی لجپال سنگتی گولیندا ریہم نہیں زمانے تے کوئی وی در چھوڑیا

لونڑ زخماں تے الٹا وگیندائے جہان کہیں نوں دکھڑا سناونڑ بڑا جرم ہے

درد لائی اے جہیڑی میکوں اپنڑیاں نال ہنجوں دے او اگ بوریندا وداں

چا کے سدھراں دا گستان سینے دے وچ سارے جگ نوں نصیحت کریندا وداں 

دوستو اج محبت ہے دھوکے دا ناں میری تحقیق ہے تائیں ہوڑیندا وداں

حال میرا ہے عبرت تساں واسطے بھوگ قسمت دے ہن بس بھوگیندا وداں

ڈاکواں نوں جیویں کوئی ویکھیندائے چا گھر کہیں نوں دل اچ وسانڑ بڑا جرم ہے

جیندیاں جی جہنم توں ودھ اے سزا کہیں نوں لگدا بناونڑ بڑا جرم ہے