قاصد گھلیا عید دی آمد آمد سنڑ کے تے قاصد نوں آکھیا کہ ونج لگدیاں ول تے پچھ آ
ونج قاصد پچھ آ سجنــڑاں توں کائی عیدالفطر دے بارے
رت جگر دی ہجر سکائی ویندائے مکے پئے نی درداں مارے
ساڈے سـر توں آنــــڑ لہا جاوے ایہ بھار ہجــــر دے بھارے
بھاویں اگے پچھے انجم نئیں ملدا وڈا دہنہ تاں نال گزارے
قاصد جدوں ساری گل سنڑائی تے اگلیاں بڑے سخت لہجے نال آکھیا
بھاویں عید منائے بھاویں ستھر وچائے اسیں عید تے آونڑا کوئی نئیں
اسیں خوش ہائیں نویاں لگدیاں وچ اوہدا دل ولچاونڑاں کوئی نئیں
اودر توں انجـــــم ڈلانــدے نوں کِســـے آہرے لاونــــــڑاں کوئی نئیں
بھانویں ہجر دے بھار توں مـــر جاوے دیـــدار کـراونڑاں کوئی نئیں
جدوں انہاں قاصد نال انج دیاں گل کیتاں ہنڑ قاصد گلنڑ دا جواز تے بچیا کوئی نہ تے قاصد نوں آکھیا
اچھا قاصد میری اپنی قسمت جیویں نبھسی عید نبھا لیساں
اہ خوش رہے نویــاں لگــدیاں وچ میں من اپنڑاں پرچـا لیساں
اس سال وی لاشے ســـدھـراں دے میں کلہیاں انجم چا لیساں
ساری زندگی روندیاں نبھ گئی اے وڈے دہنہ وی نیر وہا لیساں
جدوں قاصد ایہ گلاں سنڑیاں تے قاصد نوں ترس آیا بغیر آکھے توں منت ہاڑہ کرن وگ گیا انہاندا رویہ نہ بدلیا انہاں اوہی گل کیتی .....
میں کوئی نئیں ولنڑاں ضد نہ کـــر تینوں قاصــــد کنج سمجھاواں
اوہنوں جیندیاں انجم دل آہندائے متھے قطعن وی میں نہ لاواں
میرے بھانـــڑیں کــدنڑ دا مـر گیا ہے بھـرے ہوکے یـا وت آہواں
جداں اس تے میرا سانگا ای کوئی نئیں کیویں رل کے عید مناواں
No comments:
Post a Comment