تیری جھوٹی محبت توں میں رَج پَج گیاں تیرے مِٹھڑے بُلارے دی کائی لوڑ نئیں ,,
جگ تے اللہ سِوا کوئی کسے دا وی نئیں تیرے وقتی سہارے دی کائی لوڑ نئیں ,,
اپنڑی کُلی توں واراں تیرے کیئی محل تیرے اُچے چُوبارے دی کائی لوڑ نئیں ,,
دوستا ہُنڑ میں اپنڑاں سجنڑ آپ ہاں تیرے سانگے ادھارے دی کائی لوڑ نئیں ,,
مینوں تیری حقیقت دا علم ہو گیائے میں اِنجیں تیرے وعدے تے بھُلدا رہیاں
توں فقط مئن کھڈونڑاں سمجھدا رہیوں میں تیری تفریح دی ترکڑی تے تُلدا رہیاں
توں مینوں وعدیاں تائیں وِلیندا رہیوں تیرے دل اِچ تاں گھر ہاہ کسے ہور دا ,,
میری سچی عقیدت رہی بےاثر تیتھے غالب اثر ہاہ کسے ہور دا ,,
میتھے کل تائیں زبانی توں مردا رہیوں دراصل تینوں ڈر ہاہ کسے ہور دا ,,
کھلی بےہوش اکھ تاں خدادی قسم تیرے زانوں تے سر ہاہ کسے ہور دا ,,
تیرے در دی سلامی دے اوزے دے وِچ جہڑی ویکھی اے اکھیں قیامت نہ پُچھ
روزِ محشر توں ودھ اوہ سماں ویکھ کے نئیں دِساونڑ دے قابل ندامت نہ پُچھ
اُس دیہاڑے توں دل نال کر کے صلاح میں عقیدت دا مندر گِرا چھوڑیائے ,,
کر کے صبروتحمل جہیا پیشوا دوستی دا جنازہ پڑھا چھوڑیائے ,,
ہتھیں اپنڑیں میں غیرت دے جرنیل توں تیری یاداں دا لشکر مَرا چھوڑیائے ,,
گُزرے ویلے دا نقشہ مِٹا چھوڑیائے تئن بھُلا چھوڑیائے بس بھلُا چھوڑیائے ,,
”درؔد؎“ کوئی نہ کسے تے بھروسہ کرے کر کے اعلان دنیا نوں دَسدا پیاں
تیرے جہئے بےضمیرے توں جِند چھُٹ گئی مینوں اللہ وسایائے تے وَسدا پیاں.
No comments:
Post a Comment