راہ آہی جنگلات دا تے گھُپ انہیری رات ہائی
زور ہائی طوفان دا تے بےبہا برسات ہائی
سنِے ویس اِچ کنمبدا ہویا میرے ویہڑے وڑ پیا
مُدتاں بعدوں میرے گھر عید دا چن چڑھ پیا
اتنی راضی اچنڑاں چیتی ہوئی رب دی ذات ہائی
زور ہاہ طوفان دا تے بےبہا برسات ہائی
ٹھَر گئیاں تسیاں نگاہواں سالاں دی سِک لہہ گئی
ویدھیائی میری زباں بسم اللہ پڑھدی رِہ گئی
اوہ کائی انمول شئے ہائی یا کائی سوغات ہائی
زور ہاہ طوفان دا تے بےبہا برسات ہائی
اوہ جُو آیا ہا میرے دُکھ نوں سکھاں وِچ ڈھال کے
چھِک کے ککھ جھُگڑی وچوں میں اگ سِکائی بال کے
اوہ بڑی کرماں تے بختاں بھاگاں والی رات ہائی
زور ہاہ طوفان دا تے بےبہا برسات ہائی
بعد وِچ اُس مہرباں دا شکریہ کیتم ادا
نالے پُچھیئم کیویں اج یاد آیا ہیئی بےآسرا
آکھیئس بس رب داؤں ہوونڑی ملاقات ہاہ
زور ہاہ طوفان دا تے بےبہا برسات ہائی
عرض کیتی مُحسنا احسان کوں دوہرا تاں سہی
رب جُو گھلیائی سِکدیاں نوں رج کے اج گل لا تاں سہی
رب گواہ اے رونڑقاں دی میرے گھر بارات ہائی
زور ہاہ طوفان دا تے بےبہا برسات ہائی
درد بس قسمت دی گل میں رِہ گیئم گھاٹے دے وچ
پا بیٹھم بےہوشی وچ باہیں اپنڑیاں گاٹے دے وچ
جاگ ہوئی تاں ہور کجھ ناہ خواب دی گل بات ہائی
زور ہاہ طوفان دا تے بےبہا برسات ہائی
No comments:
Post a Comment