عابد حسین عابد تمیمی صاحب دی تخیل دی دنیا پیش کر رئیاں جس وچ اناں سسی دی قبر تے جا کے سسی نوں کجھ سوال کیتے تے سسی نے جواب دتے..
عابد تمیمی صاحب سسی نال ہم کلام ہوئے تے پہلا سوال کیتا کہ نہ توں سوہرے دیس تے موئیں تے نہ پیکے دیس تے اناں ریت دیاں ٹبیاں اچ رل رل کے مر گئیں اس دی کے وجہ..
سسی آدھی عابد انہاں تھل دیاں ٹبیاں اچ رل رل کے مرن دا وی ہک مقصد ہا..
آ میں تین دسدی آں
دوہڑا.....
تائیں موئیں آں عابد کیچ دے راہ تے پیراں نال قبر مِٹیسی
نت پیر چُمیساں شکراں دے ایمان تاں تازہ تھیسی
روح بھلسی رُلسی جنگلاں وچ نہ خان دے شہر اپڑیسی
اسے رُلنڑ دا اجر خدا توں منگساں میرا خان پنل بخشیسی
دوسرا سوال ..
سسی نال مخاطب ہو کے
جس تیاری نال توں بھنبھور چوں نکلی ہاویں انج لگدا ہا توں ضرور کیچ اپڑ ویسیں کیونکہ تیری منزلَ کیچ ہائی مڑ راہ اچ کے بنڑئیاں تیرے نال کیوں اتھے رل رل کے مر گئیں..
کیا تیرا عشق کمزور ہا؟
یا تھل دیاں ٹبیاں توں گھبرا گئیں؟
یا گرمی توں گھبرا گئیں؟
کے وجہ بنڑیں..
سسی آدھی نہ میرا عشق کمزور ہا تے نہ مین کسے گل دا ڈر ہا بس راہ ویندئیاں ہک خیال آئیا تے میں اپنڑاں سفر مکا چھوڑیا.
عابد پچھیا کی خیال آئیا
سسی دا جواب
دوہڑا
پنوں ہو سگدائے پرنی گیا ہووے نئی نیت ڈلاونڑ دتی
پرواز اچ عابد سکھ مانڑیں ازمائیش نئی آونڑ دتی
تائیں لاغر ہتھاں اکھیاں توں نئی ریت ہٹاونڑ دتی
متاں خان دی بیوی سوکنڑ سمجھے روح کیچ نئی جاونڑ دتی
تیسرا سوال..
عابد پچھدا میں سنڑیاں توں بڑی وڈی شہزادی ہائیں تیرا بڑا وڈا قبیلہ ہا دو ملکاں تے راج ہا تیرا مڑ کے بنڑیاں تیرے نال کیوں اس طرح لاوارث ہو کے مر گئیں.
کیا تیرا کسے ساتھ نئی دتا؟
سسی دا جواب
دوہڑا.
نہ سوہریاں تے نہ پیکیاں دا کوئی شخص بچاونڑ آئیائے ملک سوائیائے
میں شام دی چادر تانڑ کے سئیں پئی آ ملکُ الموت جگائیائے سفر مکائیائے
بھلا ہووے عابد وحشیاں دا جنہاں آنڑ جنازہ چائیائے بخت پرائیائے
ممنون آں ریت دے ٹبیاں دی جنہاں ریت دا کفن پوائیائے وت دفنائیائے
No comments:
Post a Comment