میرا خالق مقدراں نوں کی کر دتوئ میرے هسدے زمانے کدے وگ گئے
جهٹ دے ہاسے توں عمراں دا روونڑ ڈهیا ای هاسے جهٹ دے پراهنے کدے وگ گئے
کل دوپہراں دی گل اے پرانڑی وی نئیں میرے هونٹاں دا فقرہ امر ہوندا ہا
اونہاں راہ تے وی پهل پئے وچهائے سجنڑ جتهے سال اچ وی میرا گزر ہوندا ہا
میری اکھ دا اشارہ حکم سمجھنا میری رنجگی دا ڈاڈھا فکر ہوندا ہا
اونہاں خواب وچ وی کیں ول ناں اکھ ویکهنڑی میری اکهیں دی کاوڑ دا ڈر ہوندا ہا
جیہندے نقشے وی هنڑ تاں سجناں نوں بهل بهل گئے ایہو در ہا تے سجناں دا سر ہوندا ہا
هن تاں پنیاں وی ساقی پیویندا نہیں کوئ میرے اپنڑے مے خانے کدے وگ گئے
میرا خالق مقدراں نوں کی کر دتوئ میرے هسدے زمانے کدے وگ گئے
میرے پیراں تے سر رکھ کے سیں جاوناں اوہ وقت ها عبادت گنیندا رہیا
میری ایڈی عقیدت وی سجنڑاں نوں رئ اے میڈے پتھر دا بت وی پوجیندا رہیا
جیہڑا ناں هنڑ تاں ناں نال گوارہ ای نئیں ایہو ہتهاں تے لکھ کے چمیندا رہیا
میرے قبلہ غریباں نوں چهڈسو تے نئیں میرے قدماں تے ڈهےٴ ڈهےٴ پچهیندا رہیا
جیہڑهی اکھ نوں ہنڑ تاں ہنجوٴاں توں فرصت ای نئیں اس اکھ دے نشانے کدے وگ گئے
میرا خالق مقدراں نوں کی کر دتوئ میرے هسدے زمانے کدے وگ گئے
میرے سر تے مقدراں دی چهاں ہوندی ہا کئی پجاری تاں ہر کوئی طلبگار ہا
آپنڑی مرضی دے سودے کریندا ریہوں آپنڑا یوسف تے آپنڑا ای بازار ہا
میری بهل ہا تاں بهل اچ لٹیندا ریہاں میری قسمت دا سورج تاں غدار ہا
جیہڑا ڈهلیا تاں ڈیگر توں شام ہو گئی پتا نہیں یارانے کدے وگ گئے
میرا خالق مقدراں نوں کی کر دتوئ میرے هسدے زمانے کدے وگ گئے
وقت بدلے تاں ہر شے بدلدی گئ میری زندگی دے سارے امن رس گئے
دل دے مجنوں توں لیلی جدا ہوندی گئ اکھ چکوری توں عرشاں دے چن رس گئے
جیہنوں میں تاں خزاں وچ وی نئیں چهڈیا اج بہاراں دی رت اوہ چمن دس گئے
جیہڑے پیراں نوں چم چم کے تهکدے ای ناہن چمے پیر تے اوہو سجن رس گئے
ایہو طالب تاں محفل دی جان ہوندا ہا میرے موسم سہانے کدے وگ گئے
میرے خالق مقدراں نوں کی کر دتوئ میرے ہسدے زمانے کدے وگ گئے
No comments:
Post a Comment