ڈاڈھا تیرا تے بختاں دا جوڑ اے
تینوں کہڑی غریباں دی لوڑ اے
توں جو وطناں دا سردار ہویوں
نالے پھردا تے زردار ہویوں
تیرا چاہنڑ آلا جگ تے کروڑ اے
تینوں کہڑی غریباں دی لوڑ اے
لوکوں وکھرا مقّدر ہے تیرا
رہوی شملہ ہمیشہ اُچیرا
اللہ کہیں گل دی دیوی نہ تھوڑ اے
تینوں کہڑی غریباں دی لوڑ اے
ہستی آلے تے صاحب جاگیر اے
نال موڈھے دے راہنی امیر اے
سانگے مرضی دے چڑھ پؤنی توڑ اے
تینوں کہڑی غریباں دی لوڑ اے
درد جے رل گیوسے تاں کے وے
اسیں نہ وی ہویوسے تاں کے وے
ساڈی خاطر کسے نوں نہ چھوڑ اے
تینوں کہڑی غریباں دی لوڑ اے
No comments:
Post a Comment