کداں چنگیاں سوچیسیں اساں دکھیاں دے بارے
توں وی سُنڑدا تاں ہوسیں ساڈے اوکھے گزارے
سنجیں توئیں چن باہجھوں چارے پاسے دِسیندن
تیری نسلاں دے نوکر شودھے مَر مَر کے جیندن
دینہاں رانہہ تے کھلو کے راتیں گِنڑ گِنڑ تارے
توں وی سُنڑدا تاں ہوسیں ساڈے اوکھے گزارے
توہاں ہک ہائیں سہارا توں وی وَسیوں دُراڈا
گھاٹے ساہ پیتی ویندن کہڑا جیونڑ ایں اساڈا
جانی ٹریوں جَدوکا ساڈے تُرّٹ گئے سہارے
توں وی سُنڑدا تاں ہوسیں ساڈے اوکھے گزارے
جیویں توئیں کر وِکھائی اے سائیں اِنج نئیں کریندے
رکھدن کسیاں دے چیتے مَنوں لاہ نئیں چھُڑیندے
ساڈی زندگی تے بہوں ہِن جہڑے دِتے نی خسارے
توں وی سُنڑدا تاں ہوسیں ساڈے اوکھے گزارے
درد لوڑاں دے ویلے ساتھوں ہتھ چا لیونی
ہانی سونہہ چا کے کیتے وعدے بھُل بھَل گیونی
کلہا دَم کیویں جیسی بھار درداں دے بھارے
توں وی سُنڑدا تاں ہوسیں ساڈے اوکھے گزارے
No comments:
Post a Comment